تنطلق الإثنين 20 يونيو الجارى امتحانات الثانوية العامة 2022، حيث يؤدى الطلاب الامتحان فى المواد غير المضافة للمجموع فى التربية الدينية والتربية الوطنية، الإثنين 20 يونيو و21 يونيو فى الاقتصاد والإحصاء، بينما تبدأ الامتحانات فى المواد الدراسية الأساسية 26 يونيو الجارى بامتحان اللغة العربية والثلاثاء 28 يونيو اللغة الأجنبية الثانية والأحد 3 يوليو 2022، اختبار مواد الكيمياء للشعبة العلمية والجغرافيا للشعبة الأدبية والثلاثاء 5 يوليو الديناميكا والخميس 7 يوليو اللغة الأجنبية الأولى.
ويحصل الطلاب على إجازة بمناسبة عيد الأضحى من 9 حتى 12 يوليو 2022، ويتم استئناف الاختبارات يوم الخميس 14 يوليو بمادتى الفيزياء والتاريخ والأحد 17 يوليو يؤدى الطلاب امتحان مواد الجيولوجيا والعلوم البيئية والتفاضل والتكامل وعلم النفس والاجتماع، كما يؤدى الطلاب يوم 19 يوليو امتحان الجبر والهندسة الفراغية و21 يوليو الأحياء والرياضيات التطبيقية” الاستاتيكا” والفلسفة والمنطق.
وصلني 300 سؤال عن امتحانات الثانوية العامة على بوست “اسألني عن الثانوية”.. ودي أهم الإجابات:
= المواد خارج المجموع كلها أسئلة اختيار من متعدد.. بدون أسئلة مقالية.. والإجابة في البابل شيت.. والتصحيح إلكتروني.
= أسئلة الامتحانات تخاطب كل المستويات.. حوالي ثلث للسهولة.. حوالي ثلث لمتوسط السهولة.. ثلث متدرج في مستوى الصعوبة.
= لا يوجد نماذج إجابات بعد كل امتحان.. لأن كل امتحان له أربع نماذج إجابات.. لأن كل لجنة فيها 4 نماذج أسئلة.. وده مش معناه إن الامتحان مختلف بين طالب والتاني.. لأ، الامتحان موحد لكن ترتيب الأسئلة مختلف.. ولكن المؤكد مفيش نموذج إجابة الوزارة هتعلنه بعد كل امتحان.
= بالنسبة لعلامة (إكس).. أنا هشرحها بالبلدي.. لو انت كطالب ظللت دايرة رقم (ب) وبعدين لقيت إن (ب) مش هي إجابة السؤال، انت هتعمل علامة (إكس) على (ب) وتروح تظلل الدايرة الصح سواء كانت (أ)، (ج)، (د).. هنا الجهاز مش هيصحح اللي انت عامل عليها إكس خالص، هو هيصحح الدايرة التانية اللي انت اخترتها.. دي أنا شفتها بعيني السنة اللي فاتت بعد انتهاء النتيجة.
= السؤال اللي عليه درجة واللي عليه درجتين دي مش بتكون حاجة معلنة.. اللي بيحطوا الامتحان والمركز القومي للامتحانات فقط هم اللي بيحددوها.. بس اللي شفته السنة اللي فاتت إن الدرجتين غالبا ما بتكون على أسئلة بسيطة والدرجة بتكون على أسئلة تقيس مستوى فهم أعلى.. علشان يستفيد أكبر عدد من الطلاب بالدرجتين.
= بالنسبة لطريقة كتابة رقم الجلوس.. ورقة الأسئلة والإجابة هتلاقي فيهم 7 مربعات فاضية.. ورقم الجلوس السنادي 6 أرقام بس.. يعني عندي مربع فاضي هيبقى زيادة.. انت تسيب المربع اللي على الشمال فاضي وتكتب الست أرقام.. أو تسيب المربع اللي على اليمين فاضي وتكتب الست أرقام.. كده كده انت هتكتب رقم الجلوس من الشمال لليمين مش العكس.. يعني رقم جلوسك 123456.. أسهل حاجة إنك تكتب من الشمال 1 وبعدين باقي الأرقام وتسيب آخر مربع في اليمين فاضي.
= بالنسبة للتظمات على النتيجة.. التظلمات متلغتش ولا هتتلغي.
= بالنسبة لو أنا اخدت نموذج رقم (أ) في أول يوم امتحانات.. ده مش معناه إنك تاخد رقم النموذج في الامتحان اللي بعده.. النموذج بيختلف من مادة للتانية لأن عدد الطلاب بيقل مع كل امتحان.. يعني مثلا الكل بيمتحن عربي.. لكن نش نفس العدد بيمتحن دين إسلامي.. فيه دين مسيحي.. مش نفس العدد واخد لغة تانية فرنساوي.. فيه ألماني وإيطالي وأسباني.. فرقم النموذج أكيد هيكون مختلف من مادة للتانية.
= بالنسبة للفرق بين نموذج أسئلة (أ) ونموذج أسئلة (ب) و(ج) و(د).. مفيش فرق بينهم.. نفس الأسئلة ولكن ترتيبها مختلف.. السؤال الأول في نموذج (أ) ممكن تلاقيه رقم 30 في نموذج (ب) وهكذا.. الترتيب فقط هو اللي مختلف وده لمنع الغش بين الطلبة.. علشان كده لو سألت اللي قدامك إجابة السؤال الأول إيه مليون المية هيدهولك غلط لأنه مش نفس السؤال الأول عنده.
= بالنسبة لدرجات الاقتصاد هيضيفوها للإحصاء ولا لأ.. الإجابة أيوة بيضيفوها، لأن دي مادة واحدة بس ليها فرعين، وبعد التصحيح بيتحط درجات الإحصاء على الاقتصاد ويتحسبوا مع بعض.. يعني مثلا، لو الطالب جاب في الاقتصاد 20 وجاب في الإحصاء 5 درجات يبقى جايب 25 في الاقتصاد والاحصاء ويبقى كده ناجح.
= بالنسبة للتربية الدينية مفيهاش مقالي ولا تسميع سورة ولا كتابة سورة.. كلها اختياري.. يعني يجيب لك آية.. ويقولك دي نزلت في الصحابي مين؟.. أو نزلت في أي مناسبة، وهكذا.
= أعرف منين إن ورقة الإجابة دي بتاعت الطالب الفلاني وهي مفيهاش خطه وإيه يضمن لي مفيش لعب في التصحيح.. بص يافندم.. أول حاجة الطالب بيكتب بخط إيه على ورقة إجابته: اسمه، واسم لجنته، ورقم جلوسه، واسم المادة، وتاريخ الامتحان.. وأهم حاجة بيكتب رقم نموذج أسئلته (أ)، (ب)، (ج)، (د).. وأهم أهم حاجة يكتب رقم كود ورقة أسئلته.. وده هيكون 3 أرقام موجودين في أول ورقة من بوكليت الأسئلة.. علشان تبقى ورقة الإجابة مطابقة تماما تماما لورقة أسئلته.
= تنسيق الطالب اللي مأجل مواد من السنة اللي فاتت بيكون تنسيق زمايله التانيين بنفس الدفعة.
= الطالب اللي امتحن المواد غير المضافة للمجموع السنة اللي فاتت ونجح فيها ومأجل مواد للسنادي.. مش هيمتحن تاني المواد غير المضافة للمجموع السنادي طالما نجح فيها.
= متاح الإجابة في ورقة الأسئلة.. لكن مش هيتاخد بإجابة الطالب.. والأساس هوإجابات البابل شيت.. يعني متقولش هكتب إجابة (أ) للسؤال الأول في البابل شيت وتروح تختار إجابة تانية في ورقة الأسئلة وتقول هم يختاروا الإجابة الصح.. ده مش هيحصل صدقني.. هيتصحح لك إجابتك في البابل شيت فقط.
= اللي حط امتحان الألماني السنة اللي فاتت مش هو اللي حطه السنادي.. دي كانت لجنة كاملة والامتحان متراجع كلمة كلمة قبل ما ينطبع واللجنة اللي راجعت مضت على تعهد إن الامتحان ده مفيهوش ولا غلطة.. وعلى مستوى الصعوبة والسهولة فهو بنفس مستوى صعوبة وسهولة الفرنساوي والأسباني وغيرهم.
= تظليل دايرة البابل شيت بيكون بالقلم الجاف مش الرصاص.
= الشخص الوحيد اللي هيكون من حقه يشيل تليفون في اللجنة هو رئيس اللجنة.. ممنوع مع المراقب والملاحظ ومراقب الدور وأي شخص تاني يكون معاه تليفون.. حتى تليفون رئيس للجنة يكون من غير كاميرا.
= أي قلم مش متعارف علي شكله أو شكله غريب مش هيدخل بيه الطالب للجنة لأن فيه أقلام بها كاميرات وده حصل السنة اللي فاتت.. أي ساعة سمارت مش هتدخل.. أي طالب هيصور سؤال واحد هيتعرف لأن الكود السري الخاص بورقة الأسئلة مطبوع حتى بين الأسئلة وبيتعرف من خلال كل بيانات الطالب.. يعني لو صورت سؤال واحد ونشرته على فيسبوك أو تليجرام هتتعرف وهتسقط في كل المواد.. السنة اللي فاتت وقبلها كان الكود السري على جانب الصفحة السنادي جوه الصفحة وبين الأسئلة وفوق وتحت وفي كل حتة.
= امتحانات المنازل نفس امتحانات النظاميين في كل شيء.
= لو نسيت وظللت بقلم رصاص متقلقش.. فيه أوراق معينة جهاز التصحيح بيدي إشارة إن فيها أسئلة لم تصحح.. الأسئلة دي بتتصحح بالعين المجردة.. يدوي يعني.. ودي مثلا لسؤال الطالب ظلل بالقلم الرصاص.. أو سؤال الطالب عمل علامة إكس واختار واحدة تانية ورجع لغى الإكس الأولى وظللها تاني، وهكذا.. المهم مفيش إجابة صح انت مختارها مش هتتصحح سواء إلكتروني أو بالعين المجردة.
= مستحيل طالب هيكون مجاوب صح وياخد صفر للسؤال.. لأن جهاز التصحيح بيكون متسستم على إجابات معينة لو الطالب مجاوبها ياخد الدرجة لو مجاوبها غلط مش هياخد الدرجة.. وهقولك التصحيح بيمشي ازاي بالظبط.
= فيه أربع نماذج أسئلة بكل لجنة (أ، ب، ج، د)، الطالب اللي هياخد النموذج رقم (أ) مثلا هيبقى له كود لورقة الأسئلة، هيكتب في البابل شيت إن رقم النموذج بتاعه (أ)، ورقم الكود بتاعه كذا.. بحيث يكون نموذج البابل شيت بتاعه مطابق لنموذج الأسئلة اللي استلمه.
= بعدها بيتم فرز نماذج إجابات البابل شيت.. نموذج (أ) لوحده.. نموذج (ب) لوحده، نموذج (ج) لوحده، نموذج (د) لوحده.
= بعدها بيتم تجهيز أجهزة التصحيح الإلكتروني بإجابات كل نموذج من النماذج الأربعة.. ويتم إدخال كل نموذج مع إجاباته.. وتطلع نتيجة كل طالب حسب نموذجه وحسب اللي كتبه فقط لا غير.
= مستحيل ورقة إجابة بابل شيت لنموذج رقم (ب) تتدخل وتتصحح مع ورقة بابل شيت لنموذج رقم (أ)، مثلا، لأن العملية دي بتتراجع أكثر من أربع مرات قبل التصحيح، وبعد التصحيح.
= كل اللي عليك في اللجنة، أول حاجة تعملها تروح على البابل شيت تكتب رقم النموذج بتاعك ورقم الكود بتاعك، ودول هتلاقيهم مكتوبين أول ورقة في بوكليت الأسئلة.
= لو استلمت ورقة بابل شيت مقطعة أو مطبقة أو مش مظبوطة اطلب تغييرها قبل ما تحل.. هيكون فيه في اللجان بابل شيت فاضي بزيادة.. ولو جاوبت واتقطعت منك الورقة.. اطلب ورقة بابل شيت تانية وانقل الإجابة فيها.. بس لازم تتخلص من الورقة الأولى.. تتقطع قدامك بمعرفة المراقبين.
= أي طالب امتحن مواد السنة اللي فاتت ونجح فيها.. مش هيمتحن فيها السنادي.. ده لو مأجل مادة أو اتنين.. أو ساقط في مادة أو اتنين.. اللي انت نجحت فيه قبل كده انساه.
= إن شاء الله نكمل إجابات باقي الأسئلة تباعا..
وكان الدكتور طارق شوقى وزير التربية والتعليم والتعليم الفنى، ورئيس عام امتحانات الثانوية العامة، عقد اجتماعًا مع مديري المديريات التعليمية عبر الفيديو كونفرانس، الأسبوع الماضي، لإعلان التعليمات النهائية الخاصة بأعمال اللجان بامتحانات شهادة إتمام الدراسة الثانوية العامة للعام الدراسي 2021/ 2022، والتي من المقرر أن تبدأ 20 يونيو الجاري، بحضور الدكتور رضا حجازي نائب الوزير لشئون المعلمين وعدد من قيادات الوزارة.
وقال الدكتور طارق شوقي، إن عدد الطلاب المتقدمين لامتحانات الثانوية العامة هذا العام بلغ 707 ألف و992 طالب/طالبة (الشعبتين العلمية والأدبية)، داخل 2089 لجنة سير بكل قطاع على مستوى الجمهورية، مشيرًا إلى ضرورة الالتزام بالتعليمات الخاصة بضوابط الامتحانات والتي أعلنتها الوزارة، والعمل على التأكد من دخول الطلاب إلى اللجان بدون أي أجهزة إلكترونية “موبايل- سماعات”.
وأضاف الوزير، أن كتيب المفاهيم سيتم توزيعه على لجان الامتحانات قبل انطلاق ماراثون الامتحانات، مؤكدًا بضرورة التنبيه على الطلاب بعدم الكتابة على كتيب المفاهيم وتسليمه للمراقبين بعد انتهاء الامتحان يوميًا، وذلك لأنه ليس مسموح للطالب الخروج بكتيب المفاهيم من اللجنة.
